Ukhiphe izidumbu 'umbango' wendawo

2017-07-17 16:02

Durban - Simuncu isimo eSiqwaqweni, eShowe, enyakatho yeKwaZulu-Natal emuva kokuba kudutshulwe kwabulawa umnumzane wakwaDlamuka nomzukulu wakhe, kwashiswa isigodlo sikamama wakhona oyisangoma ngoMgqibelo ekuseni.

Kusolwa umbango wendawo ngalesi sigameko.

Kuthiwa abasolwa abathathu baqale babulala uPhiwayinkosi Dlamuka, 17, badlulela kuyisemkhulu, uMnu Magazukana Dlamuka, 58, abangagcinanga nje ngokumbulala, kodwa baphinde bamgenca ngocelemba wonke umzimba, bamshiya eyizicucu.

ILANGA lithole ukuthi kwenzeka lokhu nje, umndeni wakwaDlamuka uke wasongelwa ngokuthi uzobulawa qede unqunyiswe okwezinkukhu uma ungafuni ukusuka endaweni owakhe kuyona njengoba inombango.

Kuthiwa lo mndeni usolwa ngomakhelwane ngokuthi wakhe endaweni okungesiyona eyawo yize sekunesikhathi eside wakhile kuyona.

Umthombo wephephandaba uthi abasolwa bafike phakathi kwamabili sekulelwe, baqala endlini ebilele uPhiwayinkosi qede banyukela endlini ebilele uMnu Dlamuka nomkakhe.

OLUNYE UDABA: Uyazisola ngokulobola ingoduso yomuntu

Umthombo uthi umama wekhaya usinde ngenhlanhla njengoba abasolwa bebesho ukumqeda naye kodwa wakwazi ukuphunyuka abaleke.

Kuthiwa kwenzeka lokho nje, amanye amalungu omndeni abekhona egcekeni elele kwezinye izindlu, kanti avuswe wumsindo wokuqhuma kwesibhamu.

“Sisola umbango wendawo esihleli kuyona ngoba sekunesikhathi omakhelwane baqala ukusibangisa, besitshela ukuthi sabekwa endaweni yabantu,” kuchaza ilungu lomndeni elingafunanga ukudalulwa.

Lithi lo mndeni sekunesikhathi uhlala kule ndawo, futhi wayithenga wabekwa ngokusemthethweni kuyona.

Okhulumela amaphoyisa aKwaZulu-Natal, uCol Thembeka Mbhele, uthe kuvulwe amacala amabili okubulala nokucekela phansi impahla.

Uthi amaphoyisa abengakabophi muntu kulesi sigameko kodwa aphansi phezulu nophenyo.

- News 24

NEXT ON NEWS24 ISIZULUX
Isimo sezulu
Emigwaqweni
iLotto
Cpt: 14-18°C More clouds than sun. Mild. Pta: 18-32°C Sunny. Pleasantly warm.
Jhb: 14-27°C Sunny. Pleasantly warm. Bloem: 12-31°C High level clouds. Pleasantly warm.
Dbn: 19-34°C Sunny. Hot. PE: 18-24°C Sunny. Mild.
Isibikezelo sezulu sezinsuku ezingu-7...