UDJ ukhihla esinaNandi ngokuthathelwa inguduso

2017-12-03 18:04

Durban - Ukhihla esililo ngezinkomo zakhe uDJ waseThekwini abelobole ngazo ingoduso yakhe, osekunezinsolo zokuthi isithathwe yisihlabani somculo saseNigeria esingaconsi phansi kulezi zinsuku, uDavido.

UMbuso Khuzwayo owaziwa ngelikaDJ Twitty kubikwa ukuthi ufuna zibuye izinkomo zakhe abelobole ngazo.

Imithombo ethembekile yeLANGA LangeSonto esondelene noTwitty ithi lo DJ udinwe uyaqhuma njengoba inguduso yakhe uSandy Mzolo ebonakala ezithombeni ezinkundleni zokuxhumana ethokozile noDavido.

Lezi zithombe yizo eziqinisa izinsolo zokuthi bayathandana.

"UTwitty akasabulali ubuthongo, uhlukunyezwa yindaba kaSandy olokhu efaka izithombe zakhe noDavido bengcebeleka," kulanda umthombo osondelene kakhulu noTwitty.

OLUNYE UDABA: Kuhlokome uTwitter uMgarimbe 'esaphaza' uDJ Twitty

UDavido ubalwa nabaculi abahamba phambili kulo nyaka njengoba enezingoma ezithakaselwa kakhulu ngabesifazane okubalwa kuzo esihloko sitho Follow.

UTwitty waqala ukuthandana nale ntokazi isafunda kwaze kwaba ithola umsebenzi.

Omunye umthombo uthe: "Unebhadi lo mfana. Awukwazi ukuthi umuntu umkhiphele izinkomo kodwa yena avele apepenyeke namadoda phesheya kwezilwandle lapho ungafinyeleli khona. Kodwa naye uTwitty uyashesha ukulobola, kumele ehlise kancane."

Ethintwa uTwitty ngalolu daba uvele wathi yena ufuna izinkomo zakhe. "Sengihlukene naye, senginenye ingoduso futhi yaseNewlands, eThekwini, uBuhle Hadebe, kodwa uDavido kumele angikhokhele izinkomo zami ngoba ngalobola," esho.

Uthi njengoba ubeselobolile bese kushoda kancane nje ukuba bashade noSandy.

Imizamo yokuthola uSandy ukuba aphawule ayiphumelelanga kanti leli phephandaba lihlulekile nokuxhumana noDavido kwazise unqamula amazwe.

- News24

NEXT ON NEWS24 ISIZULUX
Isimo sezulu
Emigwaqweni
iLotto
Cpt: 15-20°C Sunny. Cool. Pta: 16-30°C Showers early. Scattered clouds. Pleasantly warm.
Jhb: 15-26°C Showers early. Morning clouds. Warm. Bloem: 13-31°C Sunny. Pleasantly warm.
Dbn: 18-23°C a few showers. Decreasing cloudiness. Mild. PE: 14-20°C Mostly sunny. Cool.
Isibikezelo sezulu sezinsuku ezingu-7...