Kushone inqwaba kuhlasela izidlamlilo ebezigqokise kodokotela esibhedlela

2017-03-08 19:31

Kabul – Oshayasibhamu abebegqokise okodokotela bagasele kwancane indawo esibhedlela sombutho wezempi esikhulu e-Afghanistan ngoLwesithathu, nalapho bebulale khona abantu abangaphezu kwabangu-30 kulokhu kuhlasela okuthathe amahora angu-6. Iqembu lezidlamlilo, i-ISIS seliphumele obala lathi linesandla kulokhu kuhlasela.

Balinganiselwa ngaphezu kuka-50 abanye abantu abathole ukulimala kulokhu kuhlasela okwenzeke e-Sardar Daud Khan Hospital, nalapho kuthiwa inganono kanye namabhomu bekusho phezulu.

Abasebenzi basesibhedlela bese behobe emawadini esibhedlela kanti baphinde babhala nemiyalezo ezinkundleni zokuxhumana becela usizo.

“Abahlaseli bangaphakathi esibhedlela. Sithandazeleni,” omunye umsebenzi wakulesi sibhedlela ubhale kanjalo kuFacebook.

OLUNYE UDABA: Usale enkundleni unogada oshayasibhamu begebenga imoto yemali e-KZN

Abaphathi besibhedlela batshele i-AFP ukuthi oshayasibhamu abathathu abebegqoke umufaniswano omhlophe okodokotela bavele bavulela ngenhlamvu ngemuva kokuthi elinye idelakufa lizisakaze ngebhomu emnyangweni ongemuva, nokwenze kwasuka isixakaxaka kulesi sibhedlela esinemibhede engu-400.

“Ngibone omunye wabahlaseli, ehlome nge-AK-47 futhi egqoke njengodokotela, edubula iziguli kanye nonogada esitezi sesithathu,” omunye umsebenzi wakulesi sibhedlela, u-Abdul Qadeer, utshele i-AFP.

“Badubule umngani wami, kodwa ngikwazile ukubaleka… Kudingeke ukuthi ngeqe ucingo olunameva ukuze ngiphunyule.”

Kodwa-ke amasosha ase-Afghanistan agcine ebabulele laba bahlaseli ngemuva kokuthi etheleke ngendiza enophephela emhlane kulesi sibhedlela.

“Bangaphezu kwabangu-30 abantu abalimele kanti balinganiselwa kwabangu-50 abalimele kulokhu kuhlasela kwanamhlanje,” okhulumela uMnyango wezokuVikela, uDawlat Waziri, utshele i-AFP. “Iningi lezisulu yiziguli, odokotela kanye nabahlengikazi.”

- AFP

Isimo sezulu
Emigwaqweni
iLotto
Cpt: 16-22°C Sunny. Mild. Pta: 15-30°C Morning clouds. Pleasantly warm.
Jhb: 11-27°C Morning clouds. Pleasantly warm. Bloem: 7-30°C Sunny. Pleasantly warm.
Dbn: 19-29°C Morning clouds. Warm. PE: 17-31°C Sunny. Warm.
Isibikezelo sezulu sezinsuku ezingu-7...