Ubulale abaningi kuzobukwa i-movie
2012-07-20 11:52
Cape Town - Okungenani abantu abangu-14 bashonile kwathi abalinganiselwa ku-50 balimala ngesikhathi ushayasibhamu evulela ngenhlamvu emcimbini wokwethulwa kwesithombe sikaBatman, eDenver, kusho imibiko kamuva nje.
Abezindaba ze-SkyNews babike ukuthi abantu bebebaleka bekhala ubumayemaye, bephuma ebhayisikobho e-Century Aurora
16 Movie Theatre, esenxanxatheleni yezitolo e-Aurora.
Kuthiwa ushayasibhamu uvulele ngenhlamvu ngemuva kwemizuzu engu-30 kuqale isithombe i-The Dark Knight Rises waphinda wavulela isisi esikhalisa unyembezi.
"Abantu ekade bengaphakathi bathi baqale bacabanga ukuthi kusaqhubeka isithombe. Bezwe ukuqhuma ngemuva kwalokho kwacaca ukuthi kuyafiwa," kusho umethuli wezindaba uBrenda Stuart, womsakazo i-850 KOA
Radio.
AbeSkyNews bathe amaphoyisa azungeze indawo yesehlakalo, babheka iziqhumane.
Amaphoyisa athi uyedwa oboshiwe, kukholakala ukuthi lona wenze lo monakalo eyedwa.
– Landela IzindabaNews24 kuTwitter
(@IzindabaNews24).
- News24
