‘Umengameli Zuma ufuna ukufaka uDlamini-Zuma kwesikaGordhan’

2017-01-21 15:29

Durban – UMengameli Jacob Zuma uhlela ukwenza izinguquko kwiKhabhinethi lakhe afake uNkosazana Dlamini-Zuma esikhaleni sikaNgqongqoshe wezeziMali uPravin Gordhan, kusho i-COPE.

Okhulumela iCongress of the People, uDennis Bloem, uthe iqembu likholelwa ekutheni kunohlelo olukhona lokuxosha uGordhan.

“Kunamahlebezi athi obhongoza bakho konke lokhu yi-ANCWL, ANCYL, iPremier League kanye nomndeni wakwaGupta.” 

OLUNYE UDABA: I-ANCYL eKZN ifuna uZuma ashintshe iKhabhinethi ngokushesha

Leli qembu lithi lilunywe indlebe yimithombo engaphakathi ku-ANC ukuthi umengameli uhlela ukwenza izinguquko kwiKhabhinethi lakhe ngokuthi asuse uGorhan afake uDlamini-Zuma.

“Siputshuzelwe nezithi isikhala sikaDerek Hanekom sizothathwa wuGordhan bese uHanekom abe yilungu lePhalamende elejwayelekile,” kusho uBloem.

Leli qembu lithi likholelwa ekutheni ukukhushulelwa kukaDlamini-Zuma kulesi sikhundla “kuyingxenye yohlelo lokumlungiselela ukuba athathe izintambo zokuba umengameli we-ANC nowezwe.”

UBloem uthi uZuma nobhululu bakhe benza konke okusemandleni ukuqinisekisa ukuthi bayidla ngendlela abayithandayo imali yoMbuso.

- News 24

Isimo sezulu
Emigwaqweni
iLotto
Cpt: 16-21°C Morning clouds. Cool. Pta: 18-33°C Sunny. Pleasantly warm.
Jhb: 17-29°C Sunny. Pleasantly warm. Bloem: 18-27°C a few tstorms. Morning clouds. Warm.
Dbn: 20-26°C Numerous showers. Breaks of sun late. Mild. PE: 15-19°C Numerous showers. More clouds than sun. Cool.
Isibikezelo sezulu sezinsuku ezingu-7...