Kusolwa umbango wentombi ngomfundi otholakale ebulewe eNkandla

2017-03-20 18:02

Durban - Bethuka izanya abafundi baseMphemba High School, eDolwane, eNkandla, maphakathi neKwaZulu-Natal emuva kokuba kutholakale isidumbu sikazakwabo odabuka eMpangeni.

Lesi sidumbu sitholwe sisemhosheni ngoLwesithathu lomhlaka-8 kwephezulu sinamanxeba okugwazwa.

Ngokomthombo weLANGA, isidumbu sikaSandile Msimango obefunda umatikuletsheni kulesi sikole, sitholakale sisagqoke umfaniswano wesikole, ugcwele igazi.

UMsimango kuthiwa waduka ngomhlaka-6 kuyo le nyanga.

Kuthiwa ubulawa nje, ubephuma esikoleni ebusuku kade eyotadisha.

Umthombo utshele ILANGA ukuthi kabasaphephile kwazise kunendawo yokucima ukoma kule ndawo eseduze nesikole, okungenzeka ukuba izixhwanguxhwangu zilimaze abafundi.

“Umfundi utholakale enamanxeba esifubeni elele kabuhlungu emhosheni. Le nto isiyesabisa ngoba izingane kazisaphephile, kakwaziwa ukuthi kuzolandela bani manje,” kusho umzali.

Ilunga lesigungu esilawula isikole, uMnu Mandla Bhengu, lithi kunemibiko ethi umufi uke waba sembangweni wentombi phambilini kanti uzolalelwa unyendle.

OLUNYE UDABA: Kubulawe umfundi ngaphandle kwamasango esikole e-KZN

“Isimo sibi kakhulu ngoba kubulawa le ngane nje, kasazi kuzolandelani kwazise kakuyona ngisho eyasendaweni, ibifike ngokuzofunda eNkandla.

“Sethukile kakhulu singabazali, sesiyesaba ukuba izingane ziyofunda ebusuku uma sekwenzeka izehlakalo ezifuze lesi,” kusho uBhengu.

Kusolakala ukuthi umufi ugwazwe ngomunye ofunda eGodide High School, okuyisikole esakhelene neMphemba.

Okhulumela uMnyango wezeMfundo esifundazweni, uKwazi Mthethwa, uthi bayasigxeka kakhulu isenzo sokungaziphathi kahle kwabafundi.

Unxuse abafundi ukuba bahambe ngabaningi uma beya esikoleni ebusuku beyozifundela.

Okhulumela amaphoyisa uCaptain Nqobile Gwala, uthi kunecala lokubulawa kowesilisa oneminyaka engu-17 ubudala eliphenywa ngamaphoyisa aseKhombe.

Uthi uboshiwe umsolwa oneminyaka engu-17 ubudala kanti uvelile eNkantolo yeMantshi yaseNkandla ngoMsombuluko odlule.


- News 24

NEXT ON NEWS24 ISIZULUX
Isimo sezulu
Emigwaqweni
iLotto
Cpt: 14-17°C Scattered showers. More sun than clouds. Mild. Pta: 4-24°C Sunny. Mild.
Jhb: 3-20°C Sunny. Mild. Bloem: 2-21°C Sunny. Mild.
Dbn: 16-24°C Partly cloudy. Mild. PE: 12-18°C Morning clouds. Mild.
Isibikezelo sezulu sezinsuku ezingu-7...