Kuqubuke ukungaboni ngasolinye kwabe-ANC ngodaba lomhlaba

2017-07-05 09:32

Johannesburg – Kuqubuke enye inkulumompikiswano enkulu ngodaba lomhlaba engqungqutheleni ye-ANC yenqubomgomo eqhubekayo eNasrec, eNingizimu yeGoli, ngoLwesibili.

Imithombo itshele iNews24 ukuthi bebengezwa mshini abalandeli balowo ogaqele isikhundla sokuba ngumengameli olandelayo weqembu, uNkosazana Dlamini-Zuma, iningi labo elivela KwaZulu-Natal, nokuthiwa “belinomsindo futhi lingalawuleki”, lizama ukuvimbela ilungu leNational Executive Committee, uMathole Motshekga, ukuthi akhulume.

Leli qeqebana lezithunywa, kwikhomishana yesine ngoLwesibili, beliphikisana nokuchitha kukaMotshekga isiphakamiso sokuthi kuchitshiyelwe uMthethosisekelo ukuze kuvunyelwe ukudliwa komhlaba ngaphandle kwenkokhelo.

Umthombo utshele iNews24 ukuthi uMotshekga uchaze lesi siphakamiso “njengesingenasizathu futhi esiwubudedengu”.

Kukholakala ukuthi uMotshekga ume kwelokuthi uMthethosisekelo ukubeka kucace ukuthi noma ngabe yiluphi ushintsho olwenziwa kuwona kumele luhambisane noMthethosisekelo kanye nomthetho.

OLUNYE UDABA: I-ANC nesivumelwano sobuholi esizogwema ukuhlukana phakathi

“Leli qeqebana belinganeme ngokuchitha kukaMotshekga isiphakamiso, wathi kuqubula ukucwasa ngokwebala kanye nokwesekwa abantu waphinde wathi ikhwelo lokuchitshiyelwa kwesigaba 25 soMthethosisekelo alinasizathu futhi liwubudedengu,” umthombo usho kanjalo.

INews24 iyakuqonda ukuthi uDlamini-Zuma ubekwikhomishana ngesikhathi kusuka lesi sixakaxaka kanti uye wangenelela.

"UDlamini-Zuma ulivikele ilungelo lakhe lokukhuluma,” umthombo usho kanjalo.

UKhongolose uhlukene phakathi odabeni lokudliwa komhlaba ngaphandle kwenkokhelo, noluphushwa uMengameli Jacob Zuma kanye nesifundazwe aphuma kuso iKwaZulu-Natal.

UNdunankulu waseNorth West, uSupra Mahumapelo, utshele iNews24 eceleni lapho kuqhubeka khona ingqungquthela ukuthi ukudliwa komdlaba ngaphandle kwenkokhelo kumele kwenzeke kuphela uma ngabe umnikazi womhlaba esichitha isiphakamiso semali uhulumeni afuna ukuthenga ngayo umhlaba.

USihlalo we-ANC eNorthen Cape, uZamani Saul, naye usichithe kakhulu lesi siphakamiso, wathi isigaba 25 soMthethosisekelo sinikeza uhulumeni amandla okudla umhlaba, kodwa kumele lokho ukwenze “ngokulinganayo futhi hhayi noma yikanjani” – nokowumbono okukholakala ukuthi uMotshekga uye wawusekela kwikhomishana.

Omunye umthombo, obukwikhomishana yesine kulawa angu-11 abanjiwe, uthe labo abaseka ukudliwa komhlaba ngaphandle kwenkokhelo bathi ukushintsha uMthethosisekelo kungayisiza i-ANC ekuwineni amavoti bese ibhincisela nxaye i-Economic Freedom Fighters, ekhankasa ngokudliwa komhlaba.

NgoMsombuluko, kube nokushintshana ngamazwi ngesikhathi abalandeli baDlamini-Zuma bebhekana ngqo nalabo ababengoNgqongqoshe, uDerek Hanekom kanye noPravin Gordhan.

UHanekom uphoqiwe ukuthi axolise ngesikhathi senkulumompikiswano ngemuva kokuthi ebize ukubuyekezwa komgomo womhlaba “ngombhedo”, nokuholele ekutheni izithunywa zifune ukuthi abhekane nokuqondiswa izigwegwe. UGordhan yena usolwe ngokuba ngumvikeli wongxiwa abamhlophe.

Le ngqungquthela izophela ngoLwesibili, nalapho uZuma ezothula khona inkulumo yokuvala. 

- News 24

NEXT ON NEWS24 ISIZULUX
Isimo sezulu
Emigwaqweni
iLotto
Cpt: 10-18°C Morning clouds. Mild. Pta: 11-29°C More sun than clouds. Warm.
Jhb: 7-24°C Sunny. Mild. Bloem: 0-21°C Sunny. Mild.
Dbn: 12-20°C More sun than clouds. Cool. PE: 13-18°C More sun than clouds. Mild.
Isibikezelo sezulu sezinsuku ezingu-7...