Isoka lisolwa ngokubamba intombi ngomuthi

2017-05-24 19:30

Mangaung - UMamiki Letlala, 41, uthi ubengaqondisisi ukuthi kungani ehleli othandweni olumhlukumezayo.

Uthi amehlo akhe avuleka ngeSonto ngesikhathi ethola umuthi ngaphansi kombhede wakhe.

“Ngangingakwazi ukunqaba kuye. Ngangimthanda ngendlela exakile futhi sengibonile ukuthi konke lokhu kwakwenziwa wukuthi wayengisebenzisela umuthi," esho.

UMamiki waseMangaung uthi wahlangana nesoka lakhe ngoJuni wangonyaka odlule.

“Ngemuva kwamasonto amabili sithandana, sathatha isinqumo sokuba sihlale ndawonye. Isoka lami lalinokubamba amatoho abuye aphele ngakho-ke yimina engangilondla,” kusho yena.

Le ntokazi ithi isoka lalinesandla esilula futhi wayesekhathele yilona kodwa kunzima ukulilahla.

Uthi ngesonto eledlule wamangala efika endlini wathola isikhwama sakhe singekho. Ngesikhathi elibuza isoka ukuthi siphi isikhwama lamtshela ukuthi bekuvakashe izihlobo zalo kungenzeka ukuthi yizona ezisithathile.

OLUNYE UDABA:Bayagana abasebenzisa umuthi ka-R2.50!

Uthi ubecinga isikhwama ngesikhathi ebona isijumbane ngaphansi kombhede.

“Ngathi ngimubuza ngalesi sijumbane somuthi, wavele wadinwa wangitshela ukuthi umuthi wakhe wokumsiza ukuba athole umsebenzi. Wathi lo muthi uwuthathe kumthandazi,” kuqhubeka uMamiki.

Uthi wadinwa walixosha isoka, kodwa akuphelelanga lapho njengoba ngosuku olulandelayo uthi omakhelwane babona leli soka liphethe isigubhu sikaphethiloli.

“Wathuka ngesikhathi ebona ukuthi abantu bayambona. Ngavele ngaya emaphoyiseni ngathola incwadi yesivimbezelo,” kusho uMamiki.

Ngesikhathi iDaily Sun ikhuluma noVusi Xwazi okuyilona soka, uyivumile indaba yomuthi kodwa waphika ukuthi ubewusebenzisela intombi.

“Ngangisebenza njengomshayeli wetekisi ngaya esangomeni ngoba ngangiba nezingozi eziningi kodwa angizange ngimtshele uMamiki ngalo muthi,” kuchaza isoka.

- Daily Sun

NEXT ON NEWS24 ISIZULUX
Isimo sezulu
Emigwaqweni
iLotto
Cpt: 11-17°C Sunny. Mild. Pta: 7-21°C Sunny. Mild.
Jhb: 4-17°C Sunny. Mild. Bloem: -4-19°C Sunny. Mild.
Dbn: 15-20°C More sun than clouds. Cool. PE: 9-23°C Sunny. Mild.
Isibikezelo sezulu sezinsuku ezingu-7...