Umphakathi ukhiphe esinye isidumbu
2012-03-22 11:30
Durban - Kuseyindida ukufa kwensizwa yaseManzimtoti
isidumbu sayo esitholwe emakhazeni kahulumeni eScottburgh emuva kokuba
igcine ithathwa ngoshova kubo yatalajwa ngabantu ababeyisola ngokweba, kubika iSolezwe.
Isidumbu sikaSifiso “Ntabeni”
Sabela, 24, sitholwa ngoLwesibili nje yena wagcinwa ethathwa kubo
emasontweni amabili edlule. Ubesolwa ngokugqekeza egaraji
likaphethiloli i-Excel eZiko ngaseManzimtoti ekanye nabangani bakhe.
Kwenzeka lokhu nje ngoLwesibili eNkanini eKhayelitsha kushiswe amadoda
amathathu agaxwe ngamathayi afa ngoba esolwa ngokweba i-generator.
Umndeni kaSifiso uthi
usakhungekile namanje. Ulandisa ngokunyamalala kwakhe uthe kwabanjwa
kwaboshwa abangani bakhe besolwa ngokugqekeza yena wathathwa wayoshaywa
ngabanikazi baleli garaji ngoba kuthiwa uyena obephambili kulokhu.
Kuthiwa kusukela lapho akabange
esabuyiselwa ekhaya yilaba balisa umndeni obaziyo ububagagula ngamagama
futhi besho nokusho ukuthi uSifiso wagcina kubona kodwa abamazi ukuthi
waphelelaphi.
UNkk Ntombi Sabela ongunina
kaSifiso obehlengezela izinyembezi ngesikhathi echaza ngokunyamalala
kwendodana yakhe uthi wezwa kuthiwa yagcinwa ukubonwa kade ishaywa emuva
kokusolwa ngokugqekeza.
Okhulumela amaphoyisa asesifundazweni uCapt Thulani Zwane uthe bayalwazi lolu daba njengoba kuvulwe icala.
- Landela
IzindabaNews24 kuTwitter
- News24