UZuma wayexhaswa ngapha nangapha - Umbiko
2012-12-07 10:01
Johannesburg - Umbiko oyimfihlo womcwaningi mabhuku uthi baningi abantu abaxhasa ngezimali uMengameli uJacob Zuma, kuze ezokwazi ukuphila impilo ewubukhazikhazi.
Iphephandaba iMail & Guardian libike lathi ingaphezu kuka-R8 million imali ekwaxhaswa ngayo uZuma.
Lo mbiko kuthiwa ubulokhu ufihliwe, nangesikhathi iNhlangano yezikuShushisa ihlela ukubeka uZuma amacala.
Umbiko wakwa-KPMG uthi uZuma "ngusopolitiki othobekile", owamukela imali kubantu abafana nosomabhizinisi uSchabir Shaik kanye noNelson Mandela - ekuthiwa wamsayinela isheke lika-R1 million, ngemuva kokuthi ekhishwe esikhundleni sokuba yiPhini likaMengameli, ekhishwa yiloyo owabe enguMengameli uThabo Mbeki, ngoJuni ka-2005.
Ngalesi sikhathi kuthiwa uZuma wayekweleta ibhange imali elinganiselwa ku-R400 000.
Abanye ekuthiwa bamxhasa ngemali bahlanganisa osomabhizinisi uJurgen
Kögl, Vivian Reddy, umshana wakhe uKhulubuse Zuma, izinkampani iThomson-CSF
(okumanje isibizwa ngeThales) neFerrostaal.
Amabhange nawo kuthiwa ayenza konke ukuzama ukusiza uZuma, yize kwabe kucaca ukuthi ubhekene nenkinga yezimali.
Umbiko lona wabe uyingxenye yobufakazi obahlanganisa wuphiko loFezela ngonyaka ka-2006.
– "Like" ikhasi lethu
ku-Facebook uze ukwazi ukujoyina inkulumo ngolimi lwakho.
– Landela Izindaba News24 kuTwitter
(@IzindabaNews24).
- News24