Ngangizama ukugwema inhlekelele - Ramaphosa
2013-01-09 13:02
Johannesburg - IPhini likaMengameli we-African National Congress elisanda kuqokwa, uCyril Ramaphosa, uthi ngesikhathi ethi akuthathwe izinyathelo ngesikhathi kuteleke abavukuzi, wabe ezama ukugwema umonakalo omkhulu owawungase wenzeke.
URamaphosa usho kanjena ekhuluma nabezindaba ze-CNN.
Lesi sikhulu sathumela umlayezo nge-email, osukwini olwandulela ukudutshulwa kwabavukizi abangu-34, basemayini iLonmin, eMarikana.
Emlayezweni uRamaphosa wathi kumele kuthathwe izinyathelo.
Izinkulungwane zabavukuzi zabeka phansi amathuluzi zangena esitelekeni ngenyanga ka-Agasti, zikhalazela imiholo.
Ngaphambi kweKhomishana iMarikana Commission of Inquiry, uRamaphosa waphekwa ngebhodo elincane kuthiwa akachaze “ngezinyathelo” abe ethi kumele zithathwe.
“Ngaphambi kwenhlekelele yokubulawa kwabantu abangu-34, kukhona abanye abangu-10 ababevele sebebulewe. Ngangikhuluma nezikhulu ngithi azisukume kungaze konakale kakhulu,” kuchaza uRamaphosa.
– "Like" ikhasi lethu
ku-Facebook uze ukwazi ukujoyina inkulumo ngolimi lwakho.
– Landela Izindaba News24 kuTwitter
(@IzindabaNews24).