Kuthiwa uzonikwa izigidi uNzama uma esula
2012-11-23 10:01
Durban - Isikhulu samaphoyisa kaMasipala waseThekwini u-Eugene Nzama, uthenjiswe umholo wakhe weminyaka emibili, uma nje engavuma ukushiya umsebenzi wakhe, njengoba kunezinxushunxushu phakathi kwakhe nabanye abasebenzi.
Imali uNzama "azoxhawulwa" ngayo ayidalulwanga.
UNzama kuthiwa unokuphambana ngemibono nezinye izikhulu, ikakhulu kwezombusazwe, kuthiwa imizamo yokulungisa isimo yahlula noma sekubizwe izikhondlakhondla zeqembu esifundazweni, ezihlanganisa noNobhala wesifunda saseThekwini uSibongiseni Dhlomo.
Umbiko wephephandaba iMercury uthi imenenja kaMasipala uS'bu Sithole ekanye nabameli bakamasipala, baphezu komsebenzi wokuhlanganisa umhlomulo ozophuma noNzama uma evuma ukushiya umsebenzi wakhe.
Umthombo okhulume nephephandaba uthe uNzama angase avaleliswe ngezigidi, njengoba imizamo yokumchitha kamasipala yagcina iphunzile, eminye yale mizamo kwabe kuwukuthi uNzama athathe isikhundla sokuba yiNhloko yoMnyango obhekele iziNhlekelele.
UNzama wasinqaba lesi sikhundla.
– "Like" ikhasi lethu
ku-Facebook uze ukwazi ukujoyina inkulumo ngolimi lwakho.
– Landela Izindaba News24 kuTwitter
(@IzindabaNews24).
- News24
