Kuboshwe obezama ukushushumbisa idayimane
2012-11-14 10:03
Johannesburg - Indoda edabuka eLebanon ikhalelwe ngamasongo kaSigonyela esikhumulweni sezindiza i-OR Tambo International ngesikhathi ibanjwa izama ukushushumbisa idayimane lesamba esilinganiselwa ku-R20 million, kusho uphiko loKlebe.
Amaphoyisa alunywe indlebe ngomlilsa oneminyaka engu-25 ubudala, obesabhanoyini elilibangise eDubai, kusho okhulumela amaphoyisa uCaptain Paul Ramaloko.
"Sithole izicucu zedayimane ezingu-220, azigwinye ngemuva kokuthi aboshwe."
Ngenyanga kaMashi, omunye odabuka kulona leli lizwe, oneminyaka engu-27 ubudala, waboshwa ngesikhathi ebanjwa nedayimane lenani elingu-R15 million, uRamaloko uthi amaphoyisa akholwa wukuthi laba bayingxenye yesigejana esishushumbisa amadayimane.
Umsolwa uzovela ngaphambi kweNkantolo yeMantshi yaseKempton Park, ngoLwesine.
Uphenyo luyaqhubeka.
– "Like" ikhasi lethu
ku-Facebook uze ukwazi ukujoyina inkulumo ngolimi lwakho.
– Landela Izindaba News24 kuTwitter
(@IzindabaNews24).
- SAPA