Kuboshwe 2 ngokubulawa kwasebekhulile
2013-01-16 16:02
Johannesburg - Abantu ababili baboshiwe mayelana nezinsolo ngokubulawa kwabashadikazi asebekhulile, ekutholakale izidumbu zabo ekhaya labo epulazini eSomerset, ngaseParys, eFree State.
Umbiko ukhishwe wuphiko loKlebe ngoLwesithathu.
"Owesilisa nowesifazane baboshiwe eZambala, babhekene namacala okubulala. Laba babanjwe nezimpahla zabashadikazi ababulewe,"
kusho okhulumela amaphoyisa uCaptain Paul Ramaloko.
URamaloko uthi owesilisa uneminyaka engu-30 ubudala, kuthi owesifazane abe neminyaka engu-46 ubudala, laba bazovela ngaphambi kweNkantolo yeMantshi yaseParys ngoLwesihlanu.
NgoLwesibili, amaphoyisa aseFree State athe kutholakale izidumbu zabashadikazi, zisegalaji elisekhaya, elikade lsebenza njengesitolo.
"Umyeni wowesifazane utholakale elele phansi eshonile, ezinyaweni ubeboshiwe, ekhanda embozwe ngopulasitiki. Unkosikazi wakhe utholakale efakwe efrijini."
URamaloko uthi imbangela yokubulala ibingakazeki.
– "Like" ikhasi lethu
ku-Facebook uze ukwazi ukujoyina inkulumo ngolimi lwakho.
– Landela Izindaba News24 kuTwitter
(@IzindabaNews24).