INGOSI: Yibabazi lami, kwazisholo isiphukuphuku sidlalwa wumfana

2017-10-20 18:00

eThekwini - Kwesinye isikhathi abantu besimame yibona abazidelelisa ngamadoda futhi yibona abawajwayezayo ukuthi abenzele phansi ngaso sonke isikhathi.

Yibabazi lami!

“Ibabazi lifika noma yinini emqashweni wami", hhayibo omunye afike ngisho kubo kantombazane, kuhlalwe “nabosbali” kuphuzwe kube mnandi, lo muntu akakaze avele ngisho nangenkukhu layikhaya.

Kwenziwa yini vele ukuthi umuntu wesifazane athathe wonke amandla awanikeze isoka? Mi thatha, yenza noma yini ofuna ukuyenza babazi, kanjalo-nje?

Yibabazi lami!

Yebo niyathandana, kodwa kuseyisoka, ngakho-ke niyazijolela, le ndaba yokuthi uma efone ngo-23:30 ebusuku athi uyeza, nawe uyavuka uyazilungiselela. Awubuzi ukuthi uvelaphi ngalesi sikhathi, uza nje yini ayilethe ebusuku ebingeke ilinde kuse kusasa.

Yibabazi lami!

Leli soka lakho liwungoqo alazi nokuthi uthenga impuphu engakanani ngenyanga, ngingasabali izishebo noma okokugeza nokugcoba, kodwa njalo uma limemfuka, uyaliphakela, kwesinye isikhathi uze uyoboleka komashonisa upheke u-curry omnandi, wezwa phela ukuthi indlela yokubamba indoda ukuyiphekela.

Lo ngqesta wakho akakhiphi lutho lapha endlini, njalo uma umcela imali impendulo ithi, “ngizobona uma kuphela inyanga,” iphele golokoqo umuntu abike lokhu nalokhu, anyamalale.

Yibabazi lami!

Uhlezi uvika izintombi nomama wengane okudelelayo, ohlezi ekuthuka ekuthukela lo zavolo wakho, yena wenzani, uyakuhlinela akutshele ukuthi akwenzeki lutho.

Kusenjalo, akakuncengile nokuthi uhlale la endlini yakhe, uwena ohleli ngenkani ngoba uthi ngeke ukhishwe womunye umuntu endodeni.

Uhleli mahhala njalo, nawe wagudluza umuntu ukuze ube lapha.

Yibabazi lami!

Hehehe, yibabazi lakho leli elikulanda ebusuku, likubuyise ekuseni, akekho oke wakubona uhamba nalo edolobheni noma ningcebelekile. Lifika ngobumnyama, nakhona lifika lizitike ngawe, bese liyanyamalala.

Yibabazi lami!

Yilo leli elikushiya njalo uma liya emakhaya, lize likubone ngo-Januwari sekuvulwa emafemini, ngisho lisemakhaya lifona emini kuphela ebusuku alitholakali, “ayidonsi kahle endlini yami ifoni mamazi.”

Umbuzo uthi, uma ekuthanda futhi ethembekile kuwena, akamtsheli ngani umama wengane ukuba akahlukane naye phansi ayeke ukuba yisicefe empilweni yakhe ngoba akasekho lapho?

Kulula nje ukukhipha umuntu ephaketheni lakho uma esekubhedela, kodwa uma engasiboni isidingo sokwenza lokho, kukhona okushaya amanzi.

Uma ekuthanda ngempela, uzokuhlonipha ukhona aphinde akuhloniphe ungekho futhi enze ukuthembeka kuwena nomndeni wakini.

Uma ekuthanda futhi ekuhlonipha ngempela, ngeke akwenze uzizwe ungelutho noma abukise ngawe ebantwini.

Disclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Le ngosi ibhalwe ngu-

Nonkululeko Nhlapo @ndunhlapo 

 – "Like" ikhasi lethu ku-Facebook uze ukwazi ukujoyina inkulumo ngolimi lwakho.

 – Landela IzindabaNews24 kuTwitter (@IzindabaNews24).

- News24

NEXT ON NEWS24 ISIZULUX
Isimo sezulu
Emigwaqweni
iLotto
Cpt: 14-22°C Morning clouds. Mild. Pta: 13-18°C Numerous showers. More clouds than sun. Mild.
Jhb: 11-15°C Rain showers. High level clouds. Cool. Bloem: 10-26°C Sunny. Pleasantly warm.
Dbn: 17-21°C Passing showers. Morning clouds. Cool. PE: 13-18°C a few showers. Mostly cloudy. Mild.
Isibikezelo sezulu sezinsuku ezingu-7...