Abantu abangadatshukelwa ngoba bengabesifazane

2014-09-23 14:31
Sibongiseni Shangase

Sibongiseni Shangase

Cape Town - Ngenxa yenhlabamkhosi ehlonzwe uhulumeni kanye nabalwela amalungelo abantu, kuningi ukuxhaphazeka okubhekene nabantu besifazane osekuhlale obala wena owabona impahla yembuzi.

Lesandla sokuphatha abantu besifazane ntofo-ntofo sesigcine sahluma isihlava sokubenzelela nalapho kungekho sidingo khona.

Omunye umngani wami wesifazane usanda kukhala ngobudedengu bomshayeli webhasi omshiye emile esitobhini kusempondozankomo. Lo mngani wami ugcizelela lento yokudatshukelwa kwabantu besifazane kulesi sikhalo sakhe uthi “umshiya kanjani umuntu wesifazane emi yedwa esitobhini sebhasi kusemnyama”…yimihlola kaJames!

Yingoba benjani abantu besifazane, bakhubazekile?

Kubi ukushiya umuntu emi yedwa ebumnyameni angikhathali kungaba yindoda kumbe owesifazane, abantu esikhundleni sokulwa nesihlava sobudedengu nokunganakekelani kwabantu bagxisha udaba lobulili.

Athi umuntu “hayi bo akashaywa umuntu wesifazane”…ungazodlala la wena, ubani okumele ashaywe, yindoda? Akukuhle ukushaywa komuntu noma ngabe yindoda noma owesifazane noma ngabe isitabane.

Abantu mabazifundise ububele nokunakekelana ngaphandle kokufaka ubulili kulokho.

Ubabomncane wami wayeshayela amaloli, uthi ngelinye ilanga ebusuku emgwaqweni onguthelawayeka onyukelayo lapho iloli lakhe lincenga kancane, abone owesifazane eceleni komgwaqo amumise, ayikhwebule iloli emela lona wesifazane.

Uthe emvulela isicabha ngakwesobunxele kwakukhala esakhe (umshayeli) isicabha sezi-la izinsizwa zamkhomba ngenhlokohlela zamehlisa phansi zamshiya enqunu, zalibasa iloli naye lo wesifazane osetshenziswe njengodobo ukuthithibeza ingqondo yomshayeli.

Ubugebengu bubi noma ngabe benziwe ngubani, kodwa lokho akungasivimbi ukusiza abantu lasibona kuphephile khona. Makungadatshukelwa abantu besifazane begcine sebenzelelwa ezintweni eziningi.

Kepha la inhliziyo yakho nonembeza wakho ukuvumela ukwelula isandla ungakusebenzisi ukuthi “ngenza ngoba kungowesifazane” ngoba wohlangabezana nembibizane.







 Ungaxhumana neNtshebe ku-sbmvula@gmail.com


Disclaimer:INews24 iqhakambisa ukukhuluma ngokukhululeka nokuzwakaliswa kwemibono eyahlukene. Lokho kuchaza ukuthi imibono yababhali bezingosi eshicilelwe kuNews24, akuyona imibono yeNews24.


 – "Like" ikhasi lethu ku-Facebook uze ukwazi ukujoyina inkulumo ngolimi lwakho.

 – Landela IzindabaNews24 kuTwitter (@IzindabaNews24). 

- News 24

NEXT ON NEWS24 ISIZULUX
Phawula kulolu daba
0 izimpawulo
Kuvaliwe ukuphawula kulolu daba.
Isimo sezulu
Emigwaqweni
iLotto
Cpt: 17-21°C Showers late. Partly cloudy. Cool. Pta: 15-24°C Broken clouds. Mild.
Jhb: 14-23°C Afternoon clouds. Mild. Bloem: 15-28°C Morning clouds. Warm.
Dbn: 21-32°C Sunny. Warm. PE: 19-25°C Showers late. Partly cloudy. Mild.
Isibikezelo sezulu sezinsuku ezingu-7...