Izobe iyincenga eThekwini iMi Casa
2012-04-13 07:31
Durban - Abathandi be-house edle ngezinsimbi ezishaya
ngesigqi esingasheshi bazozitika ngomculo weqembu lezinsizwa ezintathu
elishisa izikhotha, iMi Casa, eBoulevard kuFlorida Road ngeSonto
emcimbini obizwa nge-One & Only, kubika iSolezwe.
Lo mcimbi ohlelwe yinkampani
eyenza imicimbi ephinde ikhangise, iT5SE nesiteshi sethelevishini
somculo iMTV Base, uzoqala ngehora lesibili emini uze uphele
entathakusa.
Leli qembu elihlanganiswe nguDr
Duda onguphrojusa obuye abe nguDJ, J-Something ongumculi ophinde ashaye
nesigingci noMo-T oshaya imfiliji, lizobe liqhulula amanoni alo afana
neThese Streets, Heavenly Sent, La Vida nezinye.
Umgqugquzeli walo mcimbi, uSibo
Mhlungu, uthe ngaphandle kwaleli qembu eliqokelwe emaqoqweni amaSouth
African Music Awards okubalwa kuwo iBest Dance Album, Best Duo or Group,
album Of The Year neMTN Records of the Year lizobe liphelezelwa ngoDJ.
Uthe amathikithi ayatholakala eComputicket, Shoprite naseCheckers ngo-R100 kuthi awe-VIP abiza u-R150.
Iphephandaba Isolezwe liphisana ngamathikithi ahamba ngamabili kubafundi abahlanu.
- “Like”
ikhasi lethu kuFacebook ukuze uthole izindaba ngolimi lwakho
- Landela
IzindabaNews24 kuTwitter
- News24