Usevalelisile eMzansi obeqeqesha iPirates

2017-03-07 18:09

Cape Town – Lowo obengumqeqeshi we-Orlando Pirates, uMuhsin Ertugral, usedalule ukuthi uhlela ukuyishiya iNingizimu Afrika ukuze aqhubeke nekusasa lakhe e-Europe.

Lo mqeqeshi waseTurkey walethwa kuleli ngumphathi weKaizer Chiefs, uKaizer Motaung, ngonyaka ka-1999 ukuze aqeqeshe iKaizer Chiefs amasizini amathathu ngaphambi kokuba ahlukane naleli qembu.

Ngemuva kwalokho ube eseqeqesha inqwaba yamaqembu akuleli okubalwa kuwo iSantos, i-Ajax Cape Town, iMpumalanga Black Aces (manje esibizwa ngeCape Town City), iGolden Arrows kanti muva nje ubeqeqesha amaBhakabhaka.

OLUNYE  UDABA: IPirates ifuna ukuziphindiselela kwiSuperSport

U-Ertugral wathusa abaningi ngesikhathi esula isigubhukane bukhona kumabonakude kulandela ukubhaxatshulwa kwePirates yiSuperSport United ngo-6-1 kanti kusukela lapho ubelokhu engasebenzi.

Lo mqeqeshi oneminyaka engu-57 ubudala uqinisekise ukuthi uzolishiya elakuleli enkundleni yezokuxhumana, iTwitter kanti lesi sinqumo sesimshiye “nenhliziyo ebuhlungu”.

“Nenhliziyo ebuhlungu ngemuva kweminyaka engu-17 ubudalala enezikhumbuzo ezinhle ngithi nisale kahle, ukuze ngiyoqhubeka nekusasa lami e-Europe,” ubufundeka kanjalo umbhalo enkundleni yezokuxhumana.

Khonamanjalo, i-Ajax ibonge lo mqeqeshi ngeqhaza lakhe ebholeni lakuleli.

- News 24

NEXT ON NEWS24 ISIZULUX
Isimo sezulu
Emigwaqweni
iLotto
Cpt: 14-17°C Passing showers. Partly cloudy. Mild. Pta: 4-24°C Sunny. Mild.
Jhb: 4-20°C Sunny. Mild. Bloem: 2-21°C Sunny. Mild.
Dbn: 16-24°C Mostly sunny. Mild. PE: 12-18°C Morning clouds. Mild.
Isibikezelo sezulu sezinsuku ezingu-7...