Kuboshwe umdlali weSuperSport
2012-10-24 16:13
Johannesburg - Ukhalelwe ngamasongo kaSigonyela umdlali weSuperSport United, ngemuva kokubanjwa eshayela imoto ngesivinini esiphezulu emgwaqeni uR21, kusho amaphoyisa eGauteng.
Okhulumela amaphoyisa uBusaphi Nxumalo, uthe umdlali oneminyaka engu-23 ubudala, ubanjwe ngasemajikeni aseNellmapius, elibhekise eTembisa.
Ubehamba ngesivinini esingu-184km/h.
Umdlali utshele amaphoyisa ukuthi kushone ugogo wakhe, nokho lokhu akuqinisekiswanga.
Udedelwe ngebheyili ka-R1000 kanti uzobuyela ngaphambi kweNkantolo yeMantshi yaseTembisa maduzane, ubhekene necala lokushayela budedengu nokushayela ngesivinini esiphezulu.
– "Like" ikhasi lethu
ku-Facebook uze ukwazi ukujoyina inkulumo ngolimi lwakho.
– Landela Izindaba News24 kuTwitter
(@IzindabaNews24).